Алматы қаласы №4 қалалық емханасының салауатты өмір салты дәрігері У.Амиркенова №68 мектеп-гимназиясының оқушыларымен «Туберкулёз және оның алдын алу» тақырыбында семинар өткізді. Кездесудің мақсаты – жасөспірімдерді туберкулез және оның жұғу жолдары, профилактикалық екпелердің маңызы туралы хабардар ету.
Маман оқушыларға қауіпті кеселдің белгілері, таралу жолдары және оның алдын алу туралы айтты. Туберкулёз – өкпе жұмысының бұзылысына әкелетін қауіпті инфекциялық ауру. Ол ауа-тамшы жолымен, әсіресе науқас адаммен жиі қарым-қатынаста болған кезде жұғады. Ауру белгілері : ұзақ жөтелу, кейде қан түкіру, кеуде тұсының ауыруы, дене қызуының көтерілуі. Дертті дер кезінде анықтау үшін жылына бір рет медициналық тексеруден өту керек. Оқушыларға аурудан сақтанудың иммунитетті нығайту, спортпен айналысу, бөлмені жиі желдету, жөтелген кезде ауызды қолмен жабу секілді жолдары айтылды. Сондай-ақ, дұрыс тамақтану, яғни калориясы жоғары ақуызды тағамдар, ет, көкөніс, жемісті рационға қосу қажеттігі ескертілді.
